歐國聯A1組賽事，克羅地亞主場迎戰「新昇班」嘅奧地利。牌面上克羅地亞實力更強，不過佢哋今仗有部分主力未必踢得，相反奧地利喺新帥蘭歷克首度領軍下，必定會以最擅長嘅逼搶踢法制敵，克羅地亞想入波都唔係咁易，今場一於博中位數2.5球入球細。

　　逼搶踢法招呼格仔軍

　　「格仔軍」克羅地亞上年喺歐國盃16強出局，上屆歐國聯亦只係僅僅護級保住A級聯賽席位，球隊多年來都係靠莫迪歷、比列錫等老將支橕。啱啱轉投熱刺嘅比列錫因傷未有入選今次大軍，莫迪歷踢完歐聯決賽歸隊冇耐，亦未必有足夠狀態正選上陣，冇咗呢兩位進攻核心，克羅地亞嘅進攻能力將大打折扣，今場要攻破對手防線有一定難度。

　　奧地利喺上屆歐國聯B1組獲首名昇班，不過球隊同樣有青黃不接問題，前鋒仍然靠老將阿拿奧杜域數胡，不過前曼聯主帥蘭歷克剛剛上任，首要目標會係加強防務，將佢一向推崇嘅逼搶踢法灌輸畀球員，就算入唔到波，都會逼到克羅地亞難以制造機會。睇番兩隊過去4次交鋒，克羅地亞雖然贏曬，但有3次總入球都係開2球或以下，今仗博入球細更穩陣。