周六朝早繼續有世盃外圍賽南美洲區賽事，由哥倫比亞主場迎戰秘魯。兩隊賽前同得17分，哥倫比亞僅憑較佳得失球差，力壓秘魯排第4，同時兩大勁敵智利、烏拉圭亦來勢洶洶，為爭奪前4位直接出線世盃決賽周資格，今仗必定有一番惡斗。雙方實力接近，加上哥倫比亞近5仗世盃外，上半場全部同對手打成平手，一於再追半場和。

　　哥倫比亞近況麻麻，近9場世盃外只得1勝。而表現低迷嘅原因，主要歸咎於入球能力疲弱，近5場世盃外都冇波入，首席射手米基爾保查、路爾斯梅利爾今屆世盃外亦只有3球進帳。幸好球隊防守力不俗，過去5場世盃外只失1球，曾「零封」巴西及烏拉圭。哥倫比亞今次徵召強陣迎戰，遠赴中東「掘金」嘅中場佔士洛迪古斯、老牌前鋒法卡奧、隊長奧斯賓拿等球星隨時候命，只有杜雲沙柏達因傷缺陣。

　　秘魯作客先做好防守

　　至於秘魯今仗只要全取3分便能昇上第4，球隊近兩仗世盃外先後擊敗玻利維亞及委內瑞拉，豪取2連勝；翼鋒安達卡里路加上連續兩仗有份建功嘅主力基斯甸古華及拿柏度拿，勢被對手嚴密看管。由於今場屬於爭出線關鍵「六分波」，預料作客嘅秘魯會先做好防守，避免落後陷入劣勢，入波唔會多。