威尔斯备战欧国盃前最后一场热身赛，会喺卡迪夫城球场对阿尔巴尼亚。威尔斯刚对法国早早踢少一个，输波不足为据，佢哋唔想连输两场造成负面影响，呢场应该会较为保守。事实上威尔斯本身攻力有限，近12场只有1场入波多过1球，撞正踢法保守嘅阿尔巴尼亚可胜不稳，估计今场闷战居多。（周日凌晨零时开赛）

　　身处欧国盃决赛周A组嘅威尔斯下周六就会踢第一场分组赛，今场係球队最后检阅。上场作客法国26分钟就有尼高威廉斯手球被逐，长时间打少个输0比3，呢场亦係佢哋近12场第3场败仗，对手分别係法国、比利时同英格兰等劲旅，其馀9战获7胜2和，其实唔算太曳。

　　不过威尔斯入球能力就偏低，呢12场只有1场入波多过1球，好多时都係因为后边防守得好，所以可以保持不败。首席球星加里夫巴利不复当年勇，而且近两年伤多过踢，又就嚟决赛周，相信佢都会就住嚟踢。

　　阿尔巴尼亚作客例龟缩
　　阿尔巴尼亚踢法都係注重防守，尤其作客更加龟缩，佢哋近5场作客全开2球以下，对住拉脱维亚同哈萨克等都入唔到波，今场作客「红龙」相信都会死守，入波唔慌多。