狂牛未執掂葡國例錫身
　　今晚另一場國際熱身賽上演「雙牙會」，西班牙主場迎戰葡萄牙。西班牙今次歐國盃大膽棄用「皇馬幫」，依家嘅人腳磨合需時，葡萄牙「拍跳」唔慌會搏，加上近年碰頭經常打和，隨時和氣收場。

　　西班牙冇「皇馬幫」
　　「狂牛」西班牙喺歐國盃被編入E組，同組有波蘭、斯洛伐克及瑞典，「狂牛」今次只選咗24人征戰，更係史上首次冇徵召皇馬球員參加大賽，包括35歲隊長兼精神領袖沙治奧拉莫斯，因養傷多時狀態不足，令佢連續參加8屆大賽嘅美夢落空。就算係其馀兩支西甲勁旅巴塞隆拿及馬德里體育會，合共只得5人入伍，最弊係主帥安歷基頻頻試陣，但連主力陣容都未有定桉，令人擔心。

　　衞冕嘅葡萄牙喺歐國盃位處F組，同組有德國、法國及匈牙利，陣中除有王牌C朗續擔大旗外，迪亞高祖達、安達施華、貝拿度施華及魯賓戴亞斯等冒起，實力有增無減。不過葡軍出戰熱身賽例錫身，近8仗「拍跳」只得3勝4和1負，喺正選腹稿大定下，為免喺歐國盃開打前出現傷兵，勢必避重就輕。兩軍近3次正面交鋒，法定時間全部打和，其中兩仗更係互交白卷，今仗打和唔奇。