「8成功力」迎擊捷克
　　歐國盃開幕在即，唔少有份參戰嘅國家隊都會進行拍跳，喺周六凌晨就有意大利主場迎戰捷克。「藍衫軍」上仗大炒聖馬力諾7蛋，將國際賽不敗紀錄增加至26場，但留意番佢哋之前5場全部開「2:0」波膽，今遇有份出征歐國盃嘅捷克，估計都會「小」試牛刀，入波都只會係一球起、兩球止，2.5球細盤啱數。

　　意大利近年喺文仙尼領軍下，重返世界頂尖勁旅行列，對上一場敗仗要數到2018年9月歐國聯0比1不敵葡萄牙，之後長達接近3年共26場賽事保持不敗，其間取得21勝5和，包括歐國盃外圍賽10戰全勝，現時世界排名第10，歐國盃第5熱門，奪標*8倍。

　　放定風唔用恩莫比尼佐真奴
　　藍軍上周六熱身賽約戰聖馬力諾，結果大勝7比0，不過文仙尼志在練兵，考察一班邊緣國腳能力，但仍然有前鋒比洛迪、貝拿迪斯治都取得「士哥」，今仗對捷克係決選26人後嘅熱身賽，將會係歐國盃首仗對土耳其嘅預演。不過，賽前有意大利傳媒收到風，今仗意軍會畀恩莫比尼抖多陣，另外效力車路士嘅佐真奴費路、艾馬臣柏美尼就因為踢完歐聯決賽冇耐，亦唔會畀佢哋上陣，意味佢哋只會用「8成功力」應戰。

　　捷克喺今屆外圍賽成績一般，以8戰得5勝3負排英格蘭之後以次名出線，對上一場國際賽係今年3月嘅世盃外，捷克作客以0比1不敵威爾斯，今屆賽事靠隊長達列達同前鋒柏德列舒希克孭飛。

　　翻查往績，意大利近年同捷克交手唔算頻密，包括2013年世盃外兩次對賽，意大利取得1勝1和，再數上去就係2006世界盃分組賽，意大利贏2比0。事實上，意大利近年同「2:0」波膽甚為有緣，喺大炒聖馬力諾之前，連續5場國際賽統統係贏呢個比數，因此與其買贏輸，不如揀2.5球入球細更加穩陣。