被视为欧国盃夺冠热门嘅法国，星期四凌晨会喺主场同威尔斯踢热身赛。法国喺决赛周身处「死亡F组」，首场分组赛就要恶斗德国，领队迪甘斯为咗令球员尽快进入高昂状态，今场唔会过分留力，尤其时隔5年重返国家队嘅宾施马要争取表现，对住威尔斯肯定会施展浑身解数，预计法国半场可以搞掂「红龙」，捧半场主胜。

法国阵容星光熠熠，保罗普巴、尼高路简迪等啱啱为球会踢完欧洲赛决赛嘅球员，今场都未必上阵，但迪甘斯手上仍有大量顶级球员选择，尤其前锋线人才济济，基利安麦巴比、基沙文之外，仲有回归嘅宾施马，估计迪甘斯今场会试验宾施马融入球队嘅进度，呢位皇家马德里前锋今季状态极佳，佢嘅加入将令法国火力更上一层楼。

威尔斯防线又伤一件

列入欧国盃A组嘅威尔斯，日前决选欧国盃26人名单，19岁中场新星哥维尔意外获得徵召，不过球队啱啱成军即有坏消息，效力圣保利嘅守将占士罗伦斯入围唔够24小时，即刻喺练习受伤而退队，领队罗拔比治已补选左闸洛克尔替补。威尔斯本身实力同法国差距极大，今场恐怕冇能力阻挡主队进击。