今晚热身赛好戏码，英格兰喺米杜士堡主场河畔球队斗奥地利。「三狮兵团」近年踢大赛前嘅热身赛都态度认真，近两届5场都赢晒，斗志唔使怀疑；奥地利实力稍逊，而且射手阿拿奥杜域肌肉拉伤缺阵，影响攻力，相信英军可以凭主场之利赢波，主胜捧得过。

喺欧国盃列入D组嘅英格兰阵中星将如云，虽然效力曼联嘅小将格连活特因伤已经宣布退出大军，并且留喺球会养伤，暂未公布有关伤势，但其他球员嘅一举一动都係全球焦点，不论「撑英」抑或「反英」球迷都会睇到实，即使英军球员实力未必係世界首屈一指，但有时靠旺盛嘅斗志，又真係踢高一班波。

格连活特因伤退队

英军球员嘅斗志亦可以从热身赛睇得出，翻查纪录，英格兰出席2018年世界盃前嘅两场热身赛，以及出战2016年欧国盃前进行嘅3场热身赛，虽然分别由修夫基同鹤臣两位唔同教头领军，但结果5场热身赛全部赢晒。「三狮兵团」传统上最后1场热身赛会用尽二线兵，尾二嗰场就会强阵出击，预料今次备战都係照办煮碗。不过，今场英军除咗曼联中坚哈利马古尼受伤将会避战，其馀效力曼城、车路士及曼联等有份踢欧联同欧霸决赛嘅球员，修夫基唔会畀佢哋正选上阵，但脚风顺到爆嘅哈利卡尼就肯定会挂帅。

奥地利冇埋阿拿奥杜域

至于欧国盃身处C组嘅奥地利，目前世界排名23，过往只曾两次杀入欧国盃决赛周，其中一次仲係以合办国身份参战，两次分组赛成绩都係1和2负出局。佢哋今次决赛周目标非常清晰，只係争取小组历史性首场胜仗，以实力计明显比英军差一截，加上效力上海上港嘅前锋阿拿奥杜域肌肉拉伤缺阵，今场难畀到「三狮兵团」压力，英格兰第一场热身赛应该可以顺利赢波。