欧国盃决赛周喺月中开打，列强已密锣紧鼓备战，其中克罗地亚于今晚热身赛主场迎战阿美尼亚。以队长莫迪历为首嘅「格仔兵团」，纯以寓赛于操心态出战，随时避重就轻，阿美尼亚连场不败可趁机偷鸡。

　　格仔兵团老将孭飞
　　克罗地亚早前已经公布参加欧国盃嘅26人大军名单，大部分都熟口熟面，包括队长莫迪历、比列锡、洛夫云、维沙积高等上届世盃亚军功臣，而且主力阵容老将偏多，主帅达历都要锡住嚟用。刚替车路士勇夺欧联冠军嘅高华锡，今仗应该唔会披甲，既然已经拣定26人唔使再删减，预计达历今仗或会试用一批边缘人，例如奥锡、杜马高巴达历等，畀机会佢哋一展身手。

　　虽然阿美尼亚无缘欧国盃，今次亦有队长米希达利恩倦勤，但佢哋状态唔错，近8仗取得6胜2和未输过，其中喺3月世盃外3连胜，包括击败冰岛及罗马尼亚，不容小觑。加上克罗地亚「拍跳」向来都唔太认真，近6仗热身赛只得3胜2和1负，为免大赛前夕有乜损伤，今仗唔会太搏，随时小胜甚至和波都唔出奇。