周五澳職下晝波，狀態回勇嘅墨爾本城主場迎戰FC麥克阿瑟。上季亞軍墨爾本城開季脫腳，頭6輪聯賽輸4場，不過近期終於回復正常，王牌前鋒佔美麥卡倫瘋狂入波取得3連勝，相反今仗對手FC麥克阿瑟高位回落，近3場2負，兩隊一來一回，正所謂寧買當頭起，墨城主勝捧得過。

　　納博特復出愈踢愈順
　　墨爾本城開季表現奇差，可以話同進攻主力納博特上陣時間掛勾。呢位翼鋒自開鑼戰贏布里斯班獅吼一仗受傷後，球隊戰績就變得波動，直到上月底傷愈復出，墨城即連贏3場，今季納博特上陣嘅4場賽事錄得全勝，與今季9場聯賽入8球嘅佔美麥卡倫，係澳職最強進攻組合之一，上場「打吡戰」以6比0狂勝墨爾本勝利，更令球隊士氣沖上高峰。

　　澳職新軍FC麥克阿瑟現時高踞聯賽榜次席，表現出乎意料地好，不過球隊近3場聯賽2度落敗，狀態明顯下滑。FC麥克阿瑟前鋒達比舒利近5場聯賽入6球，但球隊喺呢5場只入8球，進攻太過依賴呢位英格蘭前鋒，上場不敵中岸水手原因，就係被洞悉呢個弱點，喺新前鋒米利斯拉夫普波域仍然養傷下，FC麥克阿瑟變陣空間不大，墨爾本城只要搵專人嘜實達比舒利，今場主勝手到拿來。