周六凌晨意甲大戰，力爭殺入前4位嘅阿特蘭大主場迎戰弱旅史柏斯亞，喺下周歐聯對皇家馬德里嘅生死戰前，將會預演瘋狂進攻大戰。阿特蘭大近年以進攻踢法馳名歐洲，目前亦係意甲得球第2多球隊，今仗主場出擊勢必大開殺戒，為出征歐聯振奮軍心，3.5球嘅入球大放心捧。

　　主場出擊例多波入
　　阿特蘭大目前排聯賽第5位，同第4位嘅羅馬只有1分差距，馀下賽事絕對不容有失。球隊下周中要喺歐聯16強作客皇家馬德里，因此今仗特別提早周六凌晨上演，阿特蘭大可以全力出擊，作為挑戰皇馬前嘅「磨刀」賽事。阿特蘭大今季貫徹主攻踢法，26場聯賽攻入60球，入球僅少過國際米蘭，尤其喺主場出擊野心極大，近7場主場有6場總入球開4球或以上，包括近4場聯賽主場賽事，入球能力相當驚人。

　　史柏斯亞目前深受降班威脅，作客賽事嘅防守能力更令人擔懮，球隊近5場作客賽事，分別吞祖雲達斯同費倫天拿3蛋，亦曾被羅馬及拿玻里攻入4球，可見佢哋面對勁旅嘅進攻係全無招架之力。今仗面對火力數一數二嘅阿特蘭大，必定係高入球數字嘅大屠殺。