今晚欧霸16强首回合焦点大战，曼联喺奥脱福恶斗AC米兰。原本大家一心谂住睇伊巴谦莫域倒戈「红魔鬼」，可惜呢位神锋受伤缺阵，而且AC仲有一大堆伤兵；不过曼联都唔好得几多，卡云尼同拉舒福特一样成为十字兵倦勤，「天残」曼联对「地缺」AC，今场首回合相信都係稳字行先，捧半场和啱数。

　　「红魔鬼」曼联啱啱喺联赛击败曼城，球队士气当然好，可惜为胜仗付出沉重代价，喺「曼市打吡」射入第2球嘅后衞劳基梳尔受伤，今场未必出得，但中前场伤兵问题先至最严重，今季表现相当平稳嘅拉舒福特同样喺上场受伤，无奈喺比赛中途被换走，曼联原本已经有中场大脑保罗普巴仍然养伤，再加上卡云尼亦上阵成疑，今场「红魔鬼」恐怕又要靠般奴费南迪斯单天保至尊。

　　红黑兵团守势波抗战
　　至于AC米兰「战神」伊巴谦莫域养伤，曼迷「最期待嘅画面」未能出现，除此之外，克罗地亚射手列比锡2月底对罗马后亦未完全伤愈，今场唔出得。盛传被曼联睇中嘅土耳其中场查汉奴古同样成为十字兵，对「红黑兵团」攻力可谓雪上加霜。至于向来出击力甚强嘅法国左闸迪奥靴南迪斯，之前中过肺炎一直状态操唔起，严重打击AC米兰战斗力，今场作客随时大踢守势足球，避免失球在先。

　　两军喺欧洲赛同样拥有辉煌战绩，当然希望可以喺今届欧霸最后直路一放到尾捧盃，但碍于伤兵问题，相信今场16强首回合会踢得相对谨慎，加上曼联近3场主场出击全开半场和，今场值得再追。