今晚西甲獨腳戲，貝迪斯於主場迎戰基達菲。貝迪斯近期聯賽戰績回昇，多得簡拿利斯、費基亞、基斯甸泰路輪流發威，可以畀老將祖亞昆抖嚇；相反基達菲愈踢愈沉，仲連續4仗食白果，寧買當頭起，1.88倍主勝值得捧場。

　　貝迪斯踏入2021年開始轉運，雖然喺西盃8強畀畢爾包踢出局，但其馀10場只係輸過1場咁大把；單計聯賽，近7仗取得4勝2和1負，令「智利工程師」比歷連尼個帥位穩陣番好多。早前貝迪斯仲要靠39歲精神領袖祖亞昆救駕，先至逼和皇蘇，好彩一班隊友亦輪流打爭氣波，除咗簡拿利斯一度連續4仗有士哥之外，費基亞及基斯甸泰路亦不時助攻或入波，各項賽事連續13仗都有進帳，難怪依家爬番上聯賽第7位，有力挑戰下屆歐洲賽席位。

　　基達菲作客輸到慌
　　另一邊廂，基達菲於冬窗借入久保建英及卡利斯艾蘭拿後，曾經聯賽兩連勝，以為護級重現曙光。點知自從對畢爾包反輸1比5後，猶如一盆冷水照頭淋，其後4仗聯賽只得1和3負，包括接連輸畀西維爾、皇馬及皇蘇。基達菲呢4仗全部食白果，極速打回原形，眾將信心盡失，加上近6仗作客輸5場，今次造訪回勇嘅貝迪斯，恐怕凶多吉少。