欧霸盃32强首回合重头戏，西甲代表皇家苏斯达于中立场意大利都灵火併红魔鬼曼联。「皇苏」今季表现令人喜出望外，而且阵中有大衞施华、蒙利尔及倒戈嘅赞奴沙多名前英超兵，面对红魔战意十足；曼联后防不稳成为降格欧霸嘅致命伤，加上近9次喺欧洲赛斗西甲球队未赢过，曼联让波不值博，波童捧「皇苏」下盘。

　　由于多个国家受疫情影响实施出入境限制，包括今仗在内，多场欧霸盃32强首回合均需移师中立场举行；皇家苏斯达今届分组赛曾经作客1比1打和意甲代表拿玻里，对于喺意大利比赛唔会感到陌生，佢哋目前喺西甲排第5位，成绩仅次4支打入欧联16强嘅传统劲旅马体会、皇马、巴塞及西维尔，表现绝对唔曳，攻击组合奥耶沙巴尔及阿历山大伊沙克今季各项赛事合共轰入20球，其中更包办咗球队近5仗9个入波，脚风大顺，绝对有力威胁红魔大门。

　　皇家苏斯达中场赞奴沙曾喺2013至2017年期间效力红魔鬼，今次倒戈要打争气波，何况阵中仲有前曼城中场大衞施华及前阿仙奴左闸蒙利尔，对住昔日宿敌肯定唔会放软手脚。

　　曼联近年对西甲球队未威过
　　曼联由欧联降格踢欧霸，欧联分组赛作客输畀巴沙克舒希及RB莱比锡最为关键，一旦离开主场出战欧洲赛，表现始终畀唔到人信心。曼联今届6场欧联分组赛入15球，可惜当中只有1场冇失波，加埋失10球，如果计埋上届喺欧霸盃4强输畀西维尔，曼联近7场欧洲赛只获3胜4负，顾得进攻搞唔掂防守；仲有一点要留意，曼联近9次喺欧洲赛对西甲球队法定时间只得3和6负，无论对住班霸级数嘅巴塞、皇马，抑或实力次一级嘅华伦西亚及切尔达，红魔都攞唔到任何甜头，似乎西甲球队嘅细腻踢法正係红魔剋星，曼联让波宁博下盘。