星期五有英超！狼隊主場迎戰列斯聯，兩軍表現回勇，狼隊近3場聯賽2勝1和，今場有地利肯定想斬多四両，柏度尼圖有料到，可以頂替魯爾佔美尼斯位置；列斯聯繼續性感足球，近7場聯賽作客總入球全開3球或以上，今場再追2.5球入球大。

　　狼隊今季成績有所倒退，季中因墨西哥射手魯爾佔美尼受傷缺陣影響發揮，更一度連續8場英超不勝，不過呢支以葡萄牙球員為骨乾嘅球隊已經復甦，近3場聯賽2勝1和，先後以2比1擊敗阿仙奴及修咸頓，而且打和爭標勁旅李斯特城，信心返曬嚟。

　　適應冇咗魯爾佔美尼斯嘅踢法之後，狼隊上場反勝修咸頓一役，葡萄牙前鋒柏度尼圖「美斯上身」，個人表演射入世界波，呢位20歲新星打破連續13場入球荒，重拾信心，對於狼隊進攻方面，絕對係好事。

　　瘋子主帥一味攻
　　列斯聯昇上英超後，仍然貫徹性感足球，「瘋子主帥」比爾沙一直崇尚進攻足球踢法，當中以作客最能體現佢嘅足球哲學，往往無懼同主隊斗攻，不論領先或者落後都唔放棄進攻，例如上場對阿仙奴一度落後0比4，但仍然追番兩粒，以2比4落敗；作客曼聯一役，更加出現8個總入球，最終輸2比6。呢種有前無後嘅踢法造就列斯聯嘅比賽特別多入波，絕對係大盤客恩物，2.5球大盤咪錯過。