今晚欧霸G组煞科战，英超4哥李斯特城主场硬撼希腊劲旅AEK雅典。虽然李城已经提早出线，但今场赢波才确保首名出线资格，伊恩拿祖、辛基斯安达、咸沙祖靴里等副选喺今届欧霸坚抢缰，必趁机会争取表现；AEK雅典已出局冇晒包袱，随时斗攻，捧2.5球嘅大盘最上算。

　　伊恩拿祖脚风顺
　　李斯特城目前于G组与布拉加同得10分，李城对赛成绩较佳排榜首，其实李城踢完头4轮欧霸后，已笃定出线，不过阵中伤兵唔少，包括艾马迪、卡斯泰尼、列卡度彭利拿及苏恩古等中后场球员，其中后者上轮欧霸对索尔亚复出，踢咗15分钟即告伤出，同场亦有列卡度彭利拿踢咗半场就被换走，相信两人都要再抖一段时间。查实主帅罗渣士亦借欧霸畀一班副选保持状态，好似伊恩拿祖、辛基斯安达、咸沙祖靴里等喺英超冇乜机会上阵，所以嚟到欧霸非常搏命，当中伊恩拿祖今届已有3球进帐，非常生性，难得有得担正，甚至比一班主力更有战意。

　　另一边厢，AEK雅典头5轮分组赛只得1胜4负，落后2哥布拉加7分，宣布提早出局，今仗只係例行公事。不过呢支希腊劲旅有前冇后，令防线中门大开，连同附加赛在内，近6场欧霸共失14粒，全开3球或以上，其中4仗于上半场已经失守，加上出咗局更可尽情进攻，不妨再追大盘。