今晚欧霸盃J组焦点战，热刺作客硬撼宁斯。虽然热刺有北伦敦打吡后顾，但加里夫巴利、卡路士云尼斯奥斯等副选分量十足，亦要趁机争取表现，加上于欧霸连场报捷，为尽快锁定出线资格必搏尽，直取让球客胜。

　　热刺今季表现突出，开咧后各项赛事近18场取得12胜4和仅2败，唔单止杀上英超榜首，亦喺欧霸盃J组同1哥安特卫普同得9分，不过主帅「寸王」摩连奴今次出奇地低调，话佢哋唔係争标组，明显係为球队减压，果然老谋深算。不过热刺嚟紧周日联赛要出战北伦敦打吡，硬撼死对头阿仙奴，无论为争标定为面子，呢场唔衰得，预计「寸王」今仗会收起哈利卡尼、孙兴民等主力。

　　虽然有所保留，但唔代表热刺出副选会好差，不妨望望佢哋嘅后备席，加里夫巴利、卡路士云尼斯奥斯同迪利阿里都够晒级数喇。由于「寸王」之前试用巴利伙拍哈利卡尼同孙兴民，效果麻麻，因此暂时只能用住Plan B先，不过唔使踢得咁密，对成日伤嘅「大圣爷」嚟讲仲好，上轮欧霸盃大胜卢多格德斯4比0，卡路士云尼斯奥斯省两粒兼有助攻，季初畀「寸王」雪藏嘅迪利阿里，难得获解冻即有助攻，个个都坚抢缰争取表现。

　　奥地利劲旅宁斯今届4场欧霸取得2胜2负，落后热刺3分，表现飘忽，而且后衞查奥拿上轮输畀安特卫普之役「直红」被逐，今仗要坐波监，令防守受削。睇番热刺出战欧霸特醒，连同外围赛在内，今届7场欧霸取得6胜1负，共入22球，当中近6场有5次至少赢2粒，今仗赢波即提早出线，可专心打联赛，让球客胜值得捧场。