欧霸盃H组赛事，2哥ＡＣ米兰主场迎战些路迪。包尾大幡些路迪已提早出局，无心恋战随时收起主力，加上佢哋喺今届欧霸盃经常大败，ＡＣ肯定抢攻争胜博出线，直取让球主胜。

　　提早出局或收起主力
　　些路迪一向都係山寨王，打亲欧洲赛即刻现晒形，今届亦唔例外，先喺欧联外围赛被踢出局，转战欧霸盃亦未见改善，今届4场分组赛只得1和3负，3场败仗均至少输2粒，包括连续2仗对布拉格斯巴达都输1比4，表现惨不忍睹。由于些路迪喺联赛落后死敌格拉斯哥流浪11分，既然喺欧霸盃已经提早毕业，梗係专心打联赛好过，今场例行公事出副选Hea踢唔奇。

　　另一边厢，2哥ＡＣ只领先第3位嘅布拉格斯巴达1分，后者今轮要硬撼榜首里尔，至少会有1队失分，倘若ＡＣ今仗赢波，出线机会大增，就算王牌伊巴谦莫域因伤倦勤，仍有列比锡及巴谦戴亚斯担大旗，攻力有保证。睇埋两军近3次交手，ＡＣ赢晒之馀，全部都赢2球或以上，今仗再大胜唔难，让球主胜好路。