留力开咧对丹麦勒住踢
　　欧国联A2组赛事，丹麦主场迎战英格兰。英超本周末开咧，欧国联只係高级版热身赛，领队修夫基当然识得避重就轻，今场会作出轮换，预计有4至5个位置调动，畀新一代球员试脚同试阵，默契有待建立；丹麦首战不敌比利时落笔打三更，当然唔希望2连败，必要加强防务，加上双方近4次交手全开半场和，不妨再追。

　　英格兰小组首战作客冰岛，排出单箭头哈利卡尼，配以史达宁、菲尔科顿及查顿辛祖辅助进攻，牌面睇攻击力好似唔错，但踢落又未达应有水准，最终只係靠12码以1比0赢波，如非冰岛喺补时射失12码，英格兰肯定未能全取3分。

　　修夫基乘机试用新人新阵
　　由于已经赢咗波，「三狮兵团」领队修夫基压力大减，呢场作客唔输就冇问题，遇正英超周六开咧，今场会作出轮换，兼且可以试下新仔同新阵式，主要目标係为下年欧国盃决赛周同世界盃外围赛做准备。

　　上仗后备上阵嘅阿历山大阿诺特肯定会正选上阵，效力列斯联嘅加云菲腊斯获修夫基赏识，今场有望正选上阵，佢踢法有啲似卡域克，配合埋迪格兰赖斯及美臣蒙特，可以畀修夫基试验一个完全唔同嘅中场阵式。至于上仗领红嘅基尔获加，中坚位置将会由艾历迪亚顶替。由于呢个新埋班阵容有待建立默契，相信开波初段都唔会太过冒进。

　　丹麦0比2首战不敌比利时，中场基斯甸艾历臣曾效力热刺7年，对英格兰球员相当熟悉，收知己知彼之效，不过除咗佢之外，丹麦进攻球员质素平庸，尤素夫保臣同积及拿臣都唔係可孭重任之辈，丹麦上场8次射门只有1次中龙门，而且早于9分钟就失守，今仗开赛初段必定会打醒十二分精神，避免重蹈覆辙，既然双方近4次交手半场不分胜负，今场不妨再追一次半场和。