今晚A1另一場「雙波戰」，波斯尼亞主場斗波蘭。波斯尼亞仲要靠老將迪斯高孭飛，4日踢2場未必回得切氣；波蘭冇咗神鋒羅拔利雲度夫斯基，鋒力打折扣，佢哋近3場歐國聯作客全開2球或以下，今場捧2.5球入球細。

　　受到疫情影響，今次歐國聯咁啱喺幾大歐洲聯賽開咧前進行，除法甲開咗波，英超同西甲本周就揭幕，跟住到意甲同德甲，各國領隊唔多唔少都有啲壓力，球員踢落都就住就住，尤其部分實力稍次嘅球隊，通常要靠一、兩位球星孭飛，所以第2場歐國聯大家抱住咩心態應戰，好影響賽果。

　　波斯尼亞同波蘭正正係呢類球隊，波斯尼亞要靠羅馬前鋒迪斯高，波蘭就倚賴拜仁神鋒羅拔利雲度夫斯基。波斯尼亞上場爆冷打和意大利，就係由迪斯高先開紀錄，但呢位隊長成34歲，4日踢2場體力要求好高，肯定難頂。

　　波蘭缺羅拔仔亦啞火

　　上月底踢完歐聯決賽嘅「羅拔仔」獲波蘭批准休息，可惜冇咗呢位神鋒，波蘭變咗冇牙老虎，上場對荷蘭全場捱打輸0比1，控球率得36%及2次射門，今場都惡唔出樣，佢哋近3場歐國聯作客全開細，可以續追。