歐國聯A1組今晚有好戲，荷蘭主場斗意大利。「橙衣兵團」上場以1球小勝波蘭，但表現唔算突出，尤其攻勢欠銳利。意大利上場和波失分，為爭出線今場不容再失，加上佢哋向來唔赦荷蘭，近5次對賽「藍衫軍」獲2勝3和，今場有得受讓，可博讓球客勝。

　　荷蘭前主帥朗奴高文轉投巴塞後，暫時由助教洛迪維治斯領軍，上場面對波蘭空有控球率，但具威脅攻門唔多，僅靠下半場貝雲積近門撞入奠勝。波蘭嗰場缺少主力羅拔利雲度夫斯基，荷蘭先可以放心壓前搶攻，否則未必入到波。

　　恩莫比尼留力等今仗

　　意大利上場畀波斯尼亞逼和1比1，連勝走勢告終，教練文仙尼被踢爆交錯出場名單，令原本打正選嘅中堅基亞連尼冇得踢，焗住臨時變陣，由法蘭斯高阿沙比頂硬上，文仙尼犯下低級錯誤後，今場唔會再大意。歐洲金靴獎得主恩莫比尼上場最後17分鍾先落場，擺明留力今晚之戰，相信呢位拉素前鋒會恢復正選，可望增強意軍鋒力。

　　意大利自缺席2018世盃後踢爭氣波，近15場國際賽保持不敗，期間錄得12勝3和，況且佢哋以往對住荷蘭，同樣佔有優勢，近5次交鋒「藍衫軍」獲2勝3和不敗戰績，包括最近1次作客荷蘭贏2比1，今場可全身而退，受讓抵玩。