无缘卡塔尔世盃决赛周嘅意大利，周四凌晨会喺伦敦温布莱球场大战阿根廷，呢场「欧美冠军战」系非一般热身赛，赛事由欧洲足协同南美足协合办，由欧国盃冠军斗美洲国家盃冠军，分量十足。今仗仲系意大利中坚基亚连尼嘅国家队告别战，令呢场大战更添意义。

近3对赛阿根廷全胜

37岁嘅基亚连尼早前宣布今场系佢嘅告别战，呢位中坚15岁就加入意大利青年军，2004年首度进身大国脚，为「蓝衣军团」各梯队征战22年，去年带领球队勇夺欧国盃冠军，基亚连尼喺告别战前表示：「我好平静，我为自己足球生涯所得到嘅成就感到光荣。」今场比赛场地温布莱，正正就系佢上年捧起欧国盃冠军嘅地方；基亚连尼早前已落实离开祖云达斯，据报将会加盟美职洛杉矶银河。

意大利今场以试阵为主，18岁新人前锋基诺图有望处子上阵，相反阿根廷会强阵出击，美斯、拿达路马天尼斯等主力可以候命。意大利同阿根廷近年甚少喺国际赛交锋，最近3次热身赛交手都系由阿根廷赢出，今仗呢支南美球队胜算较高，捧客胜。