今晚意甲國際米蘭主場斗安玻里，第2位嘅國米落後榜首AC米蘭兩分，為追趕對手，今仗全取3分夠曬決心。佢哋近8次對安玻里，6次上半場就領先，不妨再追半場主勝。

　　國米近7場比賽贏咗6場，包括意大利盃4強次回合大炒A米3蛋，晉級決賽將同祖雲達斯爭冠。佢哋依家可以專注番聯賽爭標，先求做好本份爭取贏曬剩番3場。

　　安玻里風流波欠決心

　　國米屬今季意甲入波最多嘅球隊，箭頭拿達路馬天尼斯腳風甚順，上仗聯賽又入一粒，協助球隊以2比1擊敗烏甸尼斯，呢位阿根廷國腳近10次上陣射入9球，有佢在陣國米可望迅速攻破安玻里防線。

　　安玻里已經遠離降班區，搶分壓力大減下，爭勝決心成疑，加上近9場聯賽作客不勝，其中近5場作客輸咗4場，包括以1比4大敗畀實力平庸嘅烏甸尼斯腳下，今仗遇上攻力強勁嘅國米，恐怕上半場都頂唔住，半場主勝放心捧場。