今晚西甲獨腳戲，榜尾利雲特主場迎戰皇家蘇斯達。皇蘇雖有老將大衛施華復出，但近況下滑兼攻力跌Watt，利雲特為搶分護級必奮力頑抗，捧2.5球入球細。

　　阿歷山大伊沙克冇貨交

　　榜尾利雲特今季長期於下游掙紮，近4仗聯賽贏得一場咁大把，依家落後尾4嘅卡迪斯6分，聯賽得番4輪，數字上仍有機會護級，惟有盡量搶分望逃出生天。

　　原本有力沖擊下屆歐聯席位嘅皇蘇，連續3仗聯賽失分，包括上仗被華簡歷奴逼和1比1，現時僅列第6位，落後第4位嘅馬德里體育會5分，要打入前4愈見渺茫。早前同球會續約嘅中場老將大衛施華，坐完兩仗波監後今仗可以候命，不過呢支巴斯克球隊，自從首席射手奧耶沙巴爾重創後，攻力開始跌Watt，近7仗入得5粒，其中6仗開2球或以下，阿歷山大伊沙克等前鋒持續冇貨交，今仗唔慌多波入。