非洲国家盃D组首仗即演重头大战，两大名牌「超霸鹰」尼日利亚同埃及正面交锋，由於同组对手畿内亚比绍同苏丹实力有限，预料埃及同尼日利亚正常发挥下可以携手出线，今场未必会选择硬碰，何况小组首仗球员入局需时，今场开中位数2.5球入球细机会高。

　　埃及前锋穆罕默德沙拿必定系今届非国盃焦点球星，呢位世界顶级神锋个人能力唔需要怀疑，不过拉匀嚟睇，埃及整体实力并唔突出，除咗沙拿之外，较具名气嘅马莫特查斯古特、艾利尼等，喺英超都只属大後备球员，因此穆罕默德沙拿就算有三头六臂，要单天保至尊都唔系咁易。

　　事实上，埃及喺葡萄牙名帅奎罗斯带领下，踢法重守轻攻，就算佢哋喺外围赛成功突围，以小组首名资格出线，但睇番埃及6场外围赛亦只系入得10球，当中仅失3球。上月大军参战阿拉伯盃，最後4场赛事法定时间内只入3球，4场总入球全部开2球或以下。

　　超霸鹰靠伊禾比食胡

　　尼日利亚出战决赛周前收到坏消息，艾曼纽丹尼斯因不获屈福特放人而未能参赛，首席射手域陀奥森汉亦因确诊新冠肺炎而落选，缺少两位当时得令嘅攻击核心，「超霸鹰」自然唔敢轻率进攻，英超球星伊禾比有机会为球队担起大旗，为尼日利亚喺今场比赛作出顽抗。

　　两支非洲劲旅喺D组出线机会同样乐观，为免喺决赛周首仗硬碰两败俱伤，今仗好大机会「留有一手」，预计以不败为大前提，加上尼日利亚过去3次同埃及交锋，全部总入球开出2球或以下，2.5球入球细更值得捧场。