今晚英超补赛，修咸顿主场对宾福特。双方都啱啱喺上周英足盃过关，匆匆再战，体力未必够时间回复。「圣人」修咸顿主场踢法稳阵，今季9场主场赛事，7次开2球或以下，今场更系圣玛利球场2022年首战，更加唔想输，估计入波唔会多，捧中位数2.5球入球细。

　　修咸顿上周英足盃作客史云斯，法定时间踢成1比1，要踢到加时先赢3比2，只系抖咗两日就要再喺联赛搏杀，体力肯定未回复得切。球队有中场迪赞尼普离队参战非国盃，另外前锋查阿当斯及中坚尼安高伊云基斯达早前确诊新冠肺炎，今场都未知出唔出得，唔多唔少影响到球队部署。

　　「圣人」斗心一般

　　「圣人」今季联赛主场2胜6和1负，好多时佢哋入咗波之後，就屯重兵喺防线死守到尾，今季佢哋主场入咗9球，当中有7球系上半场射入，另外两球喺下半场5分钟同8分钟射入，但即使畀对手追和，修咸顿都唔会谂住再次发力谷前争取入波，表现可谓极欠斗心，完全唔理支持球迷感受，所以呢9场比赛有7场系开总入球2球或以下。

　　宾福特近况的确唔错，2022年首战主场以2比1击败阿士东维拉，英足盃作客4比1大胜维尔港，不过佢哋之前经历3连败，相信主帅法兰克亦唔会轻举妄动，球队中场主力法兰安耶卡出战非国盃，後防亦有数名球员养伤，面对锺意主场死守嘅修咸顿，今场预计都系少交收赛事，一於捧入球细。