周六早上有多場美職賽事上演，其中費城聯將會主場迎戰新英倫革命；費城聯表現持續低迷，近4場聯賽只係贏得1場，就算有地利亦不宜高估。相比之下，新英倫革命愈戰愈勇，近5場贏咗4仗，士氣同狀態處於巔峰，正所謂寧捧當頭起，莫捧當頭跌，更何況新英倫革命今場受讓平半，下盤值博。

　　費城聯曾經喺5月至6月有一段唔錯表現，但之後無以為繼，其中近8場聯賽只有2勝3和3負，包括上場以1比3不敵華盛頓聯隊，而且破蛋入波都係靠對手擺烏龍。費城聯中前場球員行軍速度慢係致命傷，而且後防線亦唔見穩陣，近12場聯賽只有兩場保持清白之身，可以話係攻不銳、守不穩，今場遇上大勇嘅新英倫革命，恐怕情況唔樂觀。

　　革命雙箭頭托弗

　　作客嘅新英倫革命近年喺美國名帥艾連拿執教之下，水平有明顯提昇，今季更加長期保持好表現，值得一贊。佢哋踢咗23場聯賽取得15勝4和4負，排東岸榜首，其中近10場贏咗8場，士氣高昂，一對前鋒古斯達禾保奧、布克沙發揮出色，今季聯賽合共轟入22球，相信要撕破費城聯防線並唔困難。再睇往績，雙方近3次對賽，新英倫革命取得2勝1和，今場受讓平半更加抵玩，推介下盤。