至于世杯外J组今轮上演强弱悬殊之战，德国于瑞士中立场「作客」列支敦士登。今仗系德国新帅费历克以正印身份首度领军，佢深得阵中「拜仁帮」爱戴，遇上冇骨鱼腩列支敦士登，誓必大胜一场响头炮，让球主客和让5球都冇有怕，照捧让球客胜。

　　列支敦士登3战失10粒

　　虽然费历克于上月头先正式履新，但佢对「日耳曼军团」一啲都唔陌生，事关佢2006年获得前任勒夫邀请成为助教，其中2008年欧国杯8强战，「鼻*佬」因之前一役被逐冇得督师，费历克嗰场临危受命领军，最终以3比2击败葡萄牙，令人留下深刻印象。德国喺2014年勇夺世杯后，费历克功成身退，自此勒夫愈来愈自以为是，德国亦开始从高峰滑落，由此可见费历克对德军嘅重要性，加上佢之后带领拜仁荣膺6冠王，深得「拜仁帮」欢心，由佢延续德国助教担正例掂嘅传统，可谓顺理成章。

　　费历克今次点兵稳阵，纽亚、汤马士梅拿及甘美治等「拜仁帮」悉数入选，佢特别提到甘美治适合打防中而非右翼卫，比起固执嘅勒夫更从善如流。德国头3轮世杯外取得2胜1负，包括倒灶输畀北马其顿，依家落后榜首阿美尼亚3分，系时候急起直追。列支敦士登向来属强队点心，今届世杯外3战入1球失10粒，今场喺瑞士中立场踢冇埋地利，加上近4次交手德国全胜之余，3次赢6球或以上，让球客胜有计。