今晚德甲獨腳戲，RB萊比錫主場迎戰史特加。萊比錫上仗落筆打三更，今仗一定搶W博反彈，遇上傷兵滿營嘅「私房菜」史特加，絕對係開齋好時機，萊比錫讓1/1.5球照要上盤。

　　貴為上季德甲亞軍，萊比錫於上周聯賽首輪作客，對住有10幾名球員需隔離嘅緬恩斯，諗住實食冇黐牙，點知開波冇耐即失守，最終倒灶輸0比1，明顯衰輕敵。雖然萊比錫有少帥拿高斯文及中堅烏柏美卡奴過檔拜仁，但改由同係嘅薩爾斯堡教頭馬殊接手，並簽入上季射手榜「2哥」安達施華，連同傷愈復出嘅匈牙利新星蘇保斯拉爾，實力仍然唔錯，吸取上仗輸波教訓後，一定打醒十二分神精神應戰。

　　史特加傷兵成籮

　　史特加雖然首輪大炒格雷特霍夫5比1，暫居榜首，但能夠大勝同格雷特霍夫實力曳爆有關。史特加今季有前鋒尼高拉斯乾沙利斯同門神基哥保離隊，最弊係傷兵名單水蛇春咁長，基思富列治、莫姆施斯、奧利爾文加拉均打柴，而上季陣中首席射手沙沙卡拉積錫、尼高拉斯拿堤、坦古古尼巴利因確診新冠肺炎而要隔離，真係見到都驚。加上雙方近4次交鋒，萊比錫全部贏曬，擺明格食格，即使讓到1/1.5球，萊比錫上盤依然可取。