周六凌晨西甲第二輪賽事，貝迪斯主場迎戰卡迪斯。貝迪斯上季排第6，今季首輪作客昇班球隊馬略卡竟告和波失分，今仗返主場出擊自唔會大意；卡迪斯作風遇強愈強，但面對貝迪斯卻被食住，上季聯賽兩循環均被對手「雙殺」，貝迪斯主勝有計。

　　貝迪斯上季聯賽排第6，取得歐霸盃資格，老將祖亞昆繼續留隊擔任「精神領袖」，雖有艾沙文迪及艾馬臣艾巴里斯杜離隊，但實力仍屬中上，上仗賽和馬略卡相信只係一時疏忽，今仗有前鋒基思甸泰路「越季波監」刑滿復出，新兵桑米蘭達亦可候命，返主場出擊值得信賴。

　　上季雙殺卡迪斯

　　卡迪斯上季昇班初期連續爆冷擊敗兩大班霸皇馬及巴塞，予人遇強愈強的印象，今季正式買斷門將謝利馬斯列迪斯馬，鋒線老將尼格度仍在陣，但魯賓蘇利奴及沙邦積離隊，實力難免打折扣。上輪佢哋主場憑後衛艾方素艾斯賓奴喺補時入球，先至驚險逼和利雲特，加上去季聯賽兩循環交手貝迪斯同樣贏1比0，往績近況都唔掂，今仗作客到訪貝迪斯，恐怕凶多吉少。