今晚另一场欧霸4强首回合，「黄色潜艇」维拉利尔主场硬撼阿仙奴。维拉利尔主帅艾美利贵为「欧霸专家」，难得遇旧东家一定想报番被炒之仇，阿仙奴虽有奥巴美扬赶及复出但未必弗，好拍档拿卡锡迪因伤上阵成疑，「黄潜」挟欧霸7连胜之势，可藉地利抢先机，直取主胜。

　　2018年，艾美利接替做咗22年「厂长」嘅云格领导阿仙奴，锐意革新，可惜希望愈大、失望愈大，「兵工厂」未能重夺欧联入场券之馀，联赛战绩愈嚟愈衰，终于喺2019年11月尾被炒鱿，确实心有不甘。艾美利今季重返西甲接掌维拉利尔，虽然联赛只位居中游，但喺欧霸表现标青，唔计分组赛尾轮因卡拉巴克多人确诊而获判赢3比0，近7仗全部赢晒，唔讲得笑。

　　阿仙奴依家喺英超只排第10位，球员水准飘忽不定，近8仗赢得2场咁大把。淨係讲欧霸，阿仙奴先喺16强首回合领先奥林比亚高斯3比1下，谂住出硬线次回合踢得劲hea，最终输0比1，两回合计险胜3比2，去到8强首回合亦只能同布拉格斯拉维亚踢和1比1，若非次回合对方严重失准，佢哋都未必出到线。加上首席射手拿卡锡迪有伤在身，就算出得亦唔慌有态，反观「黄潜」前锋拍档柏高艾卡沙同谢拉特摩兰奴，喺今届欧霸已各入6粒，加上艾美利复仇心切，此消彼长下，主胜值得捧场。