星期五澳職大戰由兩支近況回勇嘅球隊對壘，FC麥克阿瑟主場迎戰珀斯光輝，戰況肯定激烈。主隊FC麥克阿瑟近期改踢343搶攻陣式，成功攞到聯賽兩連勝，一眾球員踢出信心，今場迎戰重攻輕守嘅珀斯光輝，極有機會演變為搶攻大戰，2.5球入球大值得信賴。

　　星將傷愈火力提昇
　　FC麥克阿瑟有英格蘭射手達比舒利、西班牙中場馬高蘇沙亞達等攻擊好手壓陣，雖然早排全隊演出未見突出，但近兩仗改用343陣式後，中前場嘅組織同化學作用明顯提昇，先後擊敗西部聯同威靈頓鳳凰，攞番唔少信心。再者，今季由歐洲回流嘅前鋒米利斯拉夫普波域已經傷愈，上仗亦有後備上陣，可望進一步提昇鋒線嘅競爭力，今仗主場出擊必定繼續搶攻踢法，力爭聯賽3連勝。

　　作客嘅珀斯光輝上場2比1擊敗紐卡素噴射機，終止5場不勝嘅頹勢；烏拉圭老將科拿路利仍然交到貨，今季已經有8個入球，成功同隊友卡路阿利文圖以及迪亞高卡斯度，組成強大攻擊組合。今場雖然作客，但珀斯光輝向來奉行以攻為守戰術，今季7場聯賽作客，全部總入球開出3球或以上，大盤可以繼續追捧。