周六凌晨英超獨腳戲，富咸主場誓擒列斯聯！富咸近排頻頻搶分成功，只同尾4嘅紐卡素相差2分，護級現曙光，相反列斯聯愈踢愈沉，近6場輸4場，而且近3戰零入球，富咸近7次喺卡雲農捨球場斗列斯聯獲4勝2和，加上列斯聯作客倫敦球會例牌腳軟，今季5場全部輸曬，平手盤橕硬富咸。

　　兩支昇班球隊今季表現完全唔同，富咸開季唔掂，但慢慢適應英超節奏，雖然排名一直排於尾3，但近期接連搶分成功，包括作客擊敗利物浦，與其馀中下游球隊距離愈來愈近，只分別落後紐卡素及白禮頓2分及3分，只要維持呢個走勢，隨時有機會護級成功。

　　列斯聯季初一鳴驚人，瘋狂嘅進攻足球一時嚇窒列強，不過經過漫長球季，已經畀人摸熟曬路，近6場輸4場，呢6場首席射手班福特只係入得1球，搞到球隊近3戰零入波，近況慘不忍睹。

　　列斯聯訪倫敦例冇運行
　　兩支老對手交手數據就梗係多，雖然今季首循環列斯聯主場以4比3擊敗富咸，但其實富咸喺主場一向剋住列斯聯，近7次喺卡雲農捨球場交手獲4勝2和1負，而且列斯聯又特別怕作客倫敦，今季作客水晶宮、車路士、熱刺、阿仙奴同韋斯咸全部敗陣，今場富咸睇嚟可以秤高啲，平手盤真係幾抵玩。