西甲周六凌晨獨腳戲，貝迪斯主場迎戰利雲特，貝迪斯喺上場「塞維利亞打吡戰」輸波，4連勝走勢斷纜，難免打擊士氣。至於利雲特今季聯賽作客不時有佳作，包括擊敗「馬德里雙雄」，加上近5次對貝迪斯，利雲特錄得4勝1負，明顯食住對手，今場仲有得受讓，必捧讓球客勝。

　　貝迪斯早前一度取得4連勝，但除咗贏維拉利爾一役比較有睇頭之外，另外3場對手基達菲、卡迪斯、艾拉維斯都係聯賽榜下游分子，成績有「水份」，難怪上場遇到同市勁敵西維爾，貝迪斯立即打回原形輸波收場，今場面對實力接近嘅利雲特，恐怕佔唔到甜頭。

　　近11場聯賽僅2敗
　　另一邊廂，利雲特上場西甲「巴倫西亞打吡戰」以1比0擊敗華倫西亞，表現不俗。利雲特踢法非常硬淨，近11場聯賽只係輸過兩場，包括兩斗馬體會取得1勝1和，以及作客擊敗皇馬，即使作客硬撼巴塞隆拿，利雲特亦只係僅負0比1，表現絕對唔失禮。

　　最重要係利雲特屬於貝迪斯嘅剋星，雙方近5次交鋒，利雲特取得4勝1負，合共攻入16球，其中3次贏2球或以上，佔盡上風；利雲特今場可望全身而退，受讓之下讓球客勝更加抵玩。