今晚欧联16强次回合，曼城续于匈牙利中立场再斗慕逊加柏。曼城首回合赢两球，形势大好，由于慕逊加柏自教头马高路斯提早宣布季尾离队后，军心大乱，好难收复失地，「蓝月亮」可以歎慢板睇定先食，捧3.5球嘅入球细更上算。

　　「蓝月」近6仗欧联零失球
　　由于疫情关係，两回合均移师匈牙利比赛，首回合曼城面对挂名主场嘅慕逊加柏，凭贝拿度施华及加比尔捷西斯上下半场各省1粒，赢2比0兼攞到两个作客入球，抢到先机，今仗就算输1球都可晋级，真係你急我唔急。虽然形势大好，但主帅哥迪奥拿经历近4季领军无缘欧联4强后，今仗亦不敢轻敌，佢哋今届7场欧联只失1球，其中近6仗都冇失波，防守固若金汤，今仗会用最悭水悭力方法晋级。

　　不过慕逊加柏实在唔抵争，自从教练马高路斯喺上月中宣布下季改教多蒙特后，球迷会会长认为马高路斯背叛球队，已经对佢失去信任，表明罢睇爱队赛事嘅直播，不过马高路斯坚拒辞职，战绩狂插水，各项赛事录得6连败，唔单止首回合输畀曼城，就连奥格斯堡、缅恩斯等弱队都赢到佢哋，联赛沦为中游，喺德盃亦出埋局，连一向表现稳定的队长史甸度，日前联赛对奥格斯堡亦射失12码，士气低落，今仗想反胜亦有心无力。加上「蓝月亮」近6仗欧联取得5胜1和，全开3球或以下，今仗唔使赢随时更保守，3.5球嘅细盘捧得过。