巴塞球王美斯

　　阿根廷球王美斯上年夏天几乎离开巴塞隆拿，之后亦一直传佢将于今夏自由身转会，不过依家事情出现180度变化。由于「亲美斯派系」嘅拉波塔早前当选为巴塞新会长，令美斯重新考虑留队，西班牙传媒爆料指球王最快可望喺今日同巴塞续约3年。

　　据悉，巴塞隆拿喺欧联出局后，美斯嘅团队原本按计划，将会同巴黎圣日耳门（PSG）倾谈加盟事宜，但近日却紧急叫停。西班牙传媒指，美斯希望先同巴塞新会长拉波塔会谈，再作打算，美斯嘅爸爸兼经理人佐治将于今日同拉波塔见面，并好可能达成续约协议。有传拉波塔为表诚意，愿意向美斯开出1份为期3年合约，而非一般老将嘅1年短约。如果最终成事，即将34岁嘅美斯完成新合约之后，到时已经37岁，意味佢好可能效力巴塞至挂靴。一旦美斯留队，对于今夏转会市场影响巨大，因为巴塞将放弃收购多蒙特射手艾宁夏兰特，PSG、曼城争夺美斯嘅好梦亦会成空。

　　今斗侯尔斯卡博半W

　　巴塞于今晚西甲独脚戏，主场迎战包尾大幡侯尔斯卡，美斯之前已在各项赛事为巴塞上阵766次，只要佢今仗落场，即可追平老友兼名宿沙维嘅纪录，并列「地上最强」史上上阵次数最多球员。适逢1哥马体会今轮对基达菲打和失分，若果巴塞今仗赢波，便可追近至落后4分，真係机不可失。佢哋近11场联赛豪取10胜1和，其中9次半场领先，绝对可速食犹如不设防嘅侯尔斯卡，半场主胜有买趁早。