今晚第2圈尾场，东道主艾杜哈尼主场硬撼埃及劲旅艾阿里，争入4强。艾杜哈尼乃上季卡塔尔冠军，上月才加盟嘅日职金靴奥隆加极速入局，火力大增，加上近年非洲代表都无缘4强，艾杜哈尼可藉地利赢波晋级。

　　大家讲到卡塔尔球队，可能立即谂起西班牙名宿沙维执教、有辛迪卡索拉助阵嘅艾萨德，但佢哋上季联赛冠军都争输畀艾杜哈尼，可见呢班波唔讲得笑。

　　艾杜哈尼上年10月改由林武治掌舵，呢位前法国国脚教过雷恩、诺定咸森林及科特迪瓦国家队，经验丰富，佢哋保留大部分冠军功臣，仲喺上月签入柏雷素尔前锋奥隆加，呢位肯尼亚射手上季于日职以28球荣膺神射手，虽然加盟冇耐，但佢喺日前卡塔尔盃对多哈艾阿里即大演帽子戏法，协助新东家狂数6比0，交足货信得过。

　　艾阿里踢世冠未威过
　　上季非冠盃兼埃及冠军艾阿里，仍有艾沙赫治及卡拿巴等主力压阵，论经验远胜世冠盃「初哥」艾杜哈尼，不过全属惨痛经验，自2005年起，呢支埃及劲旅曾出战12场世冠盃，但法定时间只得3胜1和8负，真係见到都唔开胃。而且近年非洲代表参加世冠盃都冇乜战意，连续6届喺4强之前已经止步，今仗随时揸流摊，宁捧有地利的艾杜哈尼好过。