今晚西班牙盃8强焦点战，巴塞隆拿作客CF格兰纳达。球王美斯近日被爆拎天价人工，即变巴塞财困「罪魁祸首」，不过仍获上下力撑，反令球队更团结，而且西盃亦係佢哋争冠目标，造访「私房菜」格兰纳达一定趁热食，客胜有计。

近日西班牙传媒大爆，美斯于2017年所续嘅4年合约，总值高达5.6亿欧元，被指摘係摧毁巴塞财政嘅罪人，备受争议，好彩球队上下都力撑佢，主帅朗奴高文、队友基沙文等都强调美斯嘅重要性，讚扬佢对巴塞及西班牙足球作出巨大贡献，值得更多尊重而非指摘，可见内部团结一致。

格兰纳达上月交手大败

据报，美斯打算状告洩密者，好大机会係前会长巴度美奥等旧高层，当然佢亦会喺场上证明自己，所赚取嘅一分一毫都物有所值。呢位球王日前先喺联赛赢毕尔包2比1之役弯入靓罚球，取得喺巴塞生涯第650个士哥，弗到震，配合近期屡有佳作嘅基沙文同法兰基迪庄，「地上最强」可以话火力全开。

虽然格兰纳达近况唔曳，近6仗只係输过1场，上圈西盃更大胜纳瓦尔卡内罗6比0，不过大部分对手实力偏弱，中场主力恩高靴里拉近日亦确诊新冠肺炎，今仗肯定缺阵，实力进一步受削。两军近9次交手，巴塞取得8胜1负压倒性优势，包括上月联赛作客大胜4粒，「地上最强」为争冠唔会Hea踢，客胜好路。