今晚另一场英超尾场大战，阿士东维拉主场斗韦斯咸；两军今季都喺不被睇好情况下踢出超水准，韦斯咸最近3次对维拉未输过，加上近4场作客取得3胜1和，计牌面呢场只係五五波，韦斯咸受让当然值得捧场。

维拉、韦斯咸上季联赛分别排第17、16位，仅仅成功护级，不过今季两队都有脱胎换骨演出。维拉季初赢过利物浦、李斯特城及阿仙奴等劲旅，并曾经登上联赛榜首，未计周三凌晨赛事，佢哋排联赛榜第9位，只比第4位嘅李斯特城少7分并少踢两场，仍有机会争入前4。韦斯咸上场虽然输畀利物浦，但之前喺各项赛事录得6连胜，战绩骄人，上场失利只因对手实力太强，料对球员信心影响不大。

汤马士苏锡克着晒火

韦斯咸今季成绩起飞，箭头查洛保云及中场汤马士苏锡克成为最大关键，尤其后者自上年冬季转会窗登陆英超后，至今已为「锤仔」攻入10个联赛入波，包括今季射入7球，以一名中场嚟讲效率超高；维拉中前场虽然都有奥尼屈坚斯及基亚利殊孭飞，不过拍埋「锤仔」一对好拍档，极其量都係打成平手，计牌面维拉冇优势可言，韦斯咸受让必捧让球客胜。