沙拿专恰「锤仔帮」

　　利物浦今晚作客斗「锤仔帮」韦斯咸，「红军」上场作客力挫热刺，终止联赛5场不胜颓势，士气回升，而且近日重拾射门鞋嘅王牌射手穆罕默德沙拿係韦斯咸剋星，今场有力率领「红军」再赢一场，1.69倍客W趁热食。

　　韦斯咸火力欠佳

　　韦斯咸近期成绩表好靓，近6场赛事录得全胜，不过当中包括2场英足盃对低组别球队史托港及唐卡士打，另外般尼、西布朗及水晶宫全部都係护级分子，韦斯咸真正实力未必好似想像中咁劲。韦斯咸自从卖走施巴斯坦贺拿后，只靠米查利安东尼奥喺前线独力支撑，新鲜热辣由曼联借用嘅连格今场又赶唔切上阵，想攻破红军防线有一定难度。

　　利物浦早前陷入低谷，最大原因唔係华基尔云迪积克及祖高美斯两位中坚重伤，事实上，「红军」防守力仍然可靠，反而係向来强劲嘅锋线突然失准，好彩上场「Big6」大战靠罗拔图法明奴、阿历山大阿诺特及沙迪奥文尼各建一功，作客以3比1击败热刺，此外，埃及国脚穆罕默德沙拿喺英足盃对曼联亦梅开二度，几名得分主力状态返咗嚟，锋力有保证。

　　值得一提係，沙拿最近7次对韦斯咸只有1次冇入波，其馀6场个人轰入7球，对住「锤仔帮」表现特别醒神，而且利物浦近8次联赛对韦斯咸亦有7胜1和压倒性优势，有「格食格」味道，今场一于捧客胜。