今日下午澳職大戰，愈戰愈勇嘅西悉尼流浪者主場迎戰剛打開勝利之門嘅紐卡素噴射機。西悉尼今季新人事新作風，多位進攻好手開始上力，近期戰績穩步上揚；作客嘅噴射機喺「群龍無首」狀態下，今季基本上以風流波心態出戰，正所謂「冇期望就冇失望」，可以放開懷抱作戰，預計今場戰情會更加開放，不妨捧2.5球入球大。

　　西悉尼流浪者自從開鑼戰意外輸波後，近3場聯賽取得2勝1和不敗走勢，新教練同多位新球員經過一段時間磨合之後，演出已漸上軌道。西悉尼教練卡爾羅賓遜手上有唔少攻擊好手，包括艾賓尼伊斯爾、杜羅奧斯及尼古拉梅拿等星級球員，球隊依家走勢咁靚，連老婆就嚟生B嘅愛爾蘭前鋒西蒙確斯都宣布唔返英國，決心留喺澳洲為球隊作戰，令西悉尼鋒力更有保證。

　　紐卡素噴射機夠進取
　　紐卡素噴射機喺冇班主兼正式主帥情況下，開鑼頭4場聯賽均輸波，直到上仗喺將士用命下作客2比1擊敗威靈頓鳳凰，成功打開今季勝利之門，球員信心大受鼓舞。事實上，噴射機喺看守教練甸恩斯領軍下，一直敢於採用進取踢法，而且由射手奧當路雲帶領下，從來都不乏入球能力。

　　不過噴射機後防穿窿係不爭事實，聯賽場場都有失波，而咁啱嘅係噴射機近4場不論輸贏，波膽都開出2比1，總入球全部多過兩球，今仗遇著攻力強勁嘅西悉尼流浪者，中位數2.5球入球大不容錯過。