今日澳職由兩支開咧輸波球隊對碰，紐卡素噴射機主場迎戰西悉尼流浪者。除力求重振雄風外，噴射機今場更要殺「叛徒」！由於球隊有財政問題，教練卡爾羅賓遜同前鋒艾賓尼伊斯爾即刻「跳船」轉投流浪者，噴射機主場出擊梗係想贏波出氣，平手盤必捧主隊。

　　紐卡素噴射機因為背後嘅中國財團未有履行投資承諾，令球隊面臨財政問題，澳洲聯賽會日前宣布終止佢哋嘅牌照，同時發出一個由澳職投資者持有嘅臨時牌照，等佢哋可以繼續參賽，直到有新財團接掌為止。

　　西悉尼近年交手輸多贏少
　　事實上噴射機管理層問題已持續多個月，但上季尾表現仍然突出。不過季前教練卡爾羅賓遜利用合約內離隊條款，無預警下轉教西悉尼流浪者，前鋒艾賓尼伊斯爾亦成功逼令球會放人，跟隨卡爾羅賓遜一齊過檔，球會對兩人勁不滿，今場戰意高昂。

　　西悉尼流浪者開咧戰不敵新軍ＦＣ麥克阿瑟，令人失望，而且佢哋近年對噴射機輸多贏少，近5次交手噴射機獲4勝1和，平手盤好路。