拳來腳往斗搶攻
　　今晚德甲獨腳戲，近況回勇嘅拜仁慕尼黑作客慕遜加柏。拜仁近期後防出現唔少漏洞，尤其比賽早段入局較慢，經常畀對手搶先入波，雙方近年交手互有贏輸，慕遜加柏主場出擊有信心同拜仁斗攻，1.5球半場大博得過。

　　拜仁慕尼黑雖然貴為5冠王，但防守一直存在漏洞，入局慢同唔集中嘅問題一直存在，佢哋近8場聯賽全部都係先失波，上仗主場對弱旅緬恩斯，竟然可以畀呢支聯賽排尾二嘅球隊上半場攻入兩粒，可想而知拜仁後防問題幾嚴重。不過呢支德甲班霸勝在火力強勁，好似上場咁，你入我2球咩，我入番你5粒，最終反勝5比2。值得留意拜仁慕尼黑近11場聯賽中，有9次上半場總入球開出兩球或以上。

　　射手列陣搶開紀錄
　　慕遜加柏對拜仁特別醒神，對上3季聯賽交手都係每季各贏1場，球隊目前雖然位處中游，但近期2連勝已經重返正軌，馬古斯杜林及比列安保路等前鋒均屬危險人物，有力擊破拜仁防線，主場出擊肯定會力求盡早開紀錄，再以擅長嘅穩守突擊迎戰；上述6場聯賽交手，有5次都係半場開兩球或以上，半場大好路。