礼拜六晚英格兰足总盃第3圈上演「双城记」，史笃城主场迎战李斯特城，虽然史笃城已经降落英冠，但佢哋一向以防守硬淨见称，绝对唔好惹，加上李斯特城要兼顾英超争标，或会轮换阵容，即将34岁嘅射手占美华迪可能休息。翻查李斯特城上届4场英足盃，总入球都係两球或以下，今场入波唔慌多。

　　史笃城2018年降落英冠之后，前两季成绩欠佳，但今季表现有改善，重拾昔日硬朗作风，虽然入球唔多，但失球数字亦少，最明显例子係近6场英冠只入两球，同时只失两球，上述6场仅1败，可见要赢佢哋，并非易事。

　　狐狸轮换唔搏命
　　李斯特城目前喺英超排第3位，仅落后利物浦同曼联1分，「狐狸兵团」首要目标都係联赛，盃赛比较次要，佢哋嚟紧面临「地狱赛程」，未来3场英超连斗强队修咸顿、车路士、爱华顿，预料领队罗渣士今场会畀部分主力休息。事实上，李城上届英足盃头3场比赛对低组别球队，占美华迪都冇踢，结果有两场小胜1比0及1场赢2比0，今仗相信情况差唔多。