逼搶+穩守招呼紅魔鬼
　　元旦日深夜英超尾場，曼聯喺主場奧脫福球場迎戰阿士東維拉。維拉係今季英超其中一支演出令人驚喜嘅球隊，領隊甸恩史密夫採取逼搶戰術，加上穩健防守，令列強嘗盡不少苦頭。曼聯今季主場表現欠佳，上仗踢到補時先至入波險勝狼隊，今場讓唔起維拉，揀讓球客勝比較明智。

　　阿士東維拉2019年夏天破球會紀錄豪花1.43億鎊增兵，但上季表現乏善足陳，今季終於到咗收成期。維拉核心基亞利殊自進身英格蘭國腳後，技術及信心都進一步提昇，固然係一大亮點，領隊甸恩史密夫買人方面作出針對性收購，亦令維拉攻守更平衡。

　　甸恩史密夫先從賓福特收購射術及速度兼備嘅奧尼屈堅斯，加強球隊攻力，買入喺阿仙奴失寵嘅門將達米安馬天尼斯，先至係今季維拉成績大躍進嘅主要原因。維拉現時14戰只失14球，固若金湯嘅防線為佢哋搶到唔少分數，尤其作客比賽情況更明顯，今季7場聯賽作客只失3球，獲得5勝1和1負佳績，當中包括擊敗李斯特城、阿仙奴及狼隊，上場亦能逼和車路士1比1。

　　曼聯最怕對手硬淨
　　曼聯今季主場表現遠比唔上作客，上仗對狼隊，全場束手無策，去到補時先至憑拉舒福特入波以1比0贏波，領隊蘇斯克查始終未能搵到最佳陣容，尤其面對踢法硬淨嘅球隊，「紅魔鬼」往往老鼠拉龜、無從入手。維拉踢法主動逼搶，即使冇波在腳亦不停走動，務求令對手減少進攻空間，曼聯現時最怕就係呢類對手，維拉絕對有力喺奧脫福球場搶分而回。