今晚英超头场，般尼主场迎战「拖肥」爱华顿。「拖肥」愈踢愈颓，其中两闸齐伤对侧击影响甚大，加上近年造访般尼例冇运行，仲要让波咪玩喇，转捧让球主胜。

　　爱华顿开季联赛4连胜，係威係势咁，但自从默西赛德打吡逼和利物浦后，「拖肥」就开始跌Watt，连同打吡在内，近6场联赛只得1胜1和4负，唯一胜仗係险胜下游分子富咸，如果唔係对方12码宴客，随时又失分。查实爱华顿季初顺风顺水，中场中路用杜哥利、安祖高美斯及阿伦卢利奥殿后，畀占士洛迪古斯可以尽情进攻，但4人全部集中晒喺中路，因此呢个4312阵式，侧击非常倚赖两闸助攻，史密斯高文及卢卡斯迪治尼亦做到瞻前顾后，合共交出5次助攻。可惜两人近期受伤，主帅安察洛堤突然改用3421阵式，但汤姆戴维斯及伊禾比出任翼衞效果麻麻，新人宾葛菲特喺3人防线中屡有犯错，令攻守失衡，难怪近期咁颓。

　　近4主场3挫爱华顿
　　般尼开季坚差，头7场联赛未赢过，上次主场出击以1比0击败水晶宫先至开斋，表现有番啲起色。之后作客曼城惨吞5蛋，纯粹技不如人，去到下半场中段更收起箭头基斯活特，明显提早投降，比数未能完全反映球队表现。翻查纪录，般尼近4次联赛主场对爱华顿，取得3胜1负，仲唔趁「拖肥」咁颓抢分咩，受让好路。