周四凌晨U21歐國盃A組焦點戰，西班牙U21將會斗比利時U21。狂牛小將首戰1比3不敵東道主意大利，後防錯漏百出，令出線形勢亮起紅燈，為保住一線生機今場肯定搶攻，可幸西班牙陣中多的是進攻天才，想入波話咁易，入球大值得留意。

　　以2015年U19歐國盃冠軍班底為骨乾嘅西班牙，陣中馬約萊爾、卡路士蘇拿同捷西斯華利祖過去一季喺西甲經常有機會上陣，踢法日漸成熟。上屆U21歐國盃決賽，西班牙雖然不敵德國屈居亞軍，不過演出絕對獲得肯定，其中「天才中場」丹尼施巴路斯就攞咗上屆嘅最佳球員獎，搶盡風頭。今屆呢位效力皇家馬德里嘅進攻好手繼續成為西班牙核心，首戰面對意大利佢就用一記世界波為球隊打開紀錄，可惜「狂牛」後防甩漏問題嚴重，最終被對手連追3球輸波收場，爭出線西班牙今場非勝不可，隨時一開波就搶攻。

　　比軍靠利亞伊斯卡

　　除大部分效力比甲聯賽嘅球員之外，比利時U21大軍中最矚目的一員，肯定係效力法甲圖盧茲的利亞伊斯卡，呢位前鋒名氣雖然不及西班牙陣中球星，不過質素有番咁上下。雖然首戰球隊不敵波蘭，但利亞伊斯卡就曾為比利時U21先開紀錄，今場面對唔算穩陣嘅西班牙後防，利亞伊斯卡有望再次發難，相信比利時有本錢同西班牙斗攻，入球大值博。