聽朝美洲國家盃B組次輪爆發生死戰，阿根廷要硬撼巴拉圭。「潘帕斯雄鷹」首輪落筆打三更，美斯搏曬老命都畀班豬隊友玩謝，前線又啞火，證明佢同阿古路有幾老友都唔work，巴拉圭遇強更唔敢亂攻，中位數2.5球嘅入球細有買趁早。

　　自上年世盃後獲短暫免役，美斯志切今年為阿根廷力爭美洲盃冠軍，但首輪對哥倫比亞只能與敵方拉成均勢，美斯多番製造良機，可惜未能把握，反而因防線兩次甩轆就輸0比2，堅係豬隊友，都咪話唔灰。始終阿根廷缺少一名具創造力嘅中場指揮官，令美斯要身兼射門、組織等多職，遠離龍門自然威力大減。雖然佢同阿古路於場外猶如「hehe」般老友，但比賽中再次證明兩人未能擦出火花，不斷失機，若果繼續用佢哋攻堅，唔慌入到波。

　　巴拉圭受過教訓勢死守

　　巴拉圭首戰對同組最弱嘅卡塔爾，竟喺領先2球下被對手逼和2比2，除咗防線唔集中之外，前線亦頻頻浪費拉開紀錄的機會，最終失分亦係抵死。查實巴拉圭近年水准每況愈下，唔單止於上屆美洲盃分組賽出局，亦已連續2屆無緣世盃決賽周，特別自辛達告魯斯退出國家隊後，前線後繼無人，上場仲要靠36歲老將奧斯卡卡度素建功，可見人才凋零。巴拉圭吸取教訓後，今戰面對強敵肯定唔敢再大意，一定玩死守博偷雞，既然巴拉圭近6場美洲盃分組賽僅入5球，有4場開2球或以下，阿根廷前線又啞火，捧2.5球嘅細盤最上算。