周五早上南美波好戲連場，阿King有過關心水同大家分享，首推南超盃決賽次回合，河床主場再斗帕拉尼恩斯，首回合作客僅輸0比1嘅河床，回師主場火力有番咁上下，呢場收復失地冇手軟，入球大捧得過。

　　上屆自由盃盟主河床，曾經喺2015同2016年捧起過南超盃，爭標經驗豐富，呢支阿根廷豪門近期主場氣勢旺盛，近7仗取得5勝1和僅1負，而且場場都同對手斗攻，全開3球或以上，何況射手柏拉圖近3仗主場都有波入，雖然隊友守將卡斯高停賽，好彩主力右閘乾沙路蒙迪爾傷愈復出候命，實力有保證。相反巴西代表帕拉尼恩斯，一向作客表現麻麻，近8仗作客都未贏過，其中7次有失波，後防甩漏情況嚴重，呢場與其死守，不如進取啲同河床斗攻，入球大好路。