英超前列對決，神奇球隊白禮頓主場迎戰利物浦，主隊今季經歷將帥被挖角嘅打擊，不過表現依然堅挺，目前積分只比利物浦少1分，主攻踢法效率、娛樂性兼備；「紅軍」近期踢法有前冇後，今仗急於搶3分唔會客氣，兩隊好大機會駁火，3.5球入球大穩開。

　　白禮頓喺意大利領隊迪薩比帶領下，唔單止貫徹前領隊朴達嘅組織型踢法，進攻效率更加大大提昇，李安度杜沙特、阿歷斯麥亞里士打、三笘熏等攻擊球員腳風極順，白禮頓對上兩場波一共攻入9球，近7仗聯賽全部開出3球或以上，當中6場總入球更達4球或以上，鋒力相當得人驚。

　　VVD受傷利物浦防線更脆弱

　　作客嘅利物浦有荷蘭翼鋒加普來投，上場英足盃對狼隊，配合達雲紐尼斯同穆罕默德沙拿攻堅成效唔錯，而且「紅軍」為搶前4席位不容有失，作客都要主動搶攻，不過喺華基爾雲迪積克受傷下，脆弱防線更加畀唔到人信心，今場有望同白禮頓演入球騷，3.5球入球大要捧場。