英超「1哥」阿仙奴相隔个半月後再战联赛，第1击主场迎战「锤仔帮」韦斯咸，阿仙奴虽然有较多球员出战世盃，不过绝大部分喺出局後已归队备战，球队经过杜拜集训後状态唔错，可望延续上半季嘅强劲气势，最重要系酋长球场威力惊人，「兵工厂」有望开出主W。

　　阿仙奴有多达10人出战世盃赛事，不过除法国中坚威廉沙列巴外，其余战将都已经参与过热身赛，格列沙加、汤马士柏迪、宾韦特等主将更喺杜拜时已经归队。阿仙奴集训期间，先後3比0大炒里昂同2比1赢AC米兰，显示出良好状态，返英国後友赛祖云达斯虽然输波，但比赛中有7成控球率，整体表现唔差。

　　韦斯咸伤兵满营难争胜

　　阿仙奴目前有巴西箭头加比尔捷西斯受伤，但替补嘅尼基迪亚喺热身赛都有进帐，加上布卡约沙卡同加比尔马天尼利日前喺闭门热身披甲，火力仍然强劲。「兵工厂」今季主场演出极稳定，近6仗联赛主场录得全胜，今仗喺地头出击可望立即挞着。

　　韦斯咸亦有法国门将艾路拿喺世盃决赛後休息，今场未必能够披甲，中场迪格兰赖斯回归後亦未有比赛磨练，前锋米查利安东尼奥同施卡马卡有伤上阵成疑，而且「锤仔帮」今季战绩低迷，休战前5场联赛输4场，可见球队喺战术同发挥上都有问题，造访酋长球场睇嚟凶多吉少。